رسالة عزيز عمامي من داخل زنزانته بكيت وضحكت وعاودت بكيت

in Tunisie by

بعد يوم واحد من ايقافه بتهمة مسك واستعمال مخدر وسط شكوك العديد من كونات المجتمع المدني حول ما اذا كانت التهمة كيدية ردا على الحملة التي يقودها تحت عنوان  » حتى انا حرقت المركز بعث عزيز عمامي المدون المتمرد برسالة مفتوحة الى اصدقائه والمتعاطفين معه وقد كتبها بدلا عنه الناشط الحقوقي الطيب العقيلي   ونحن هنا في موقع تونيزي تيليغراف قررنا نشرها كاملة :

رسالة اليوم الأوّل إيقاف
من عزيز عمامي إلى أصدقائي و كلّ من تعاطف معي فقط.
تحيّة سجنيّة و بعد ،
أسمعوني يا جماعة، ساندوني إذا تحبّو أعملولي لجنة مساندة ، إحتجّو ،أمّا إلّي يحبني فيكم ما ينساش إلّي أنا ولد شعب زوّالي دافعت على شهداء و جرحى الثورة ،ثرت مع الثايرين ،غنّيت معاهم حلمت نفس حلمهم لأني منهم ،جعت و شبعت و عاودت جعت كيفهم ،بكيت و ضحكت و عاودت بكيت عليهم لأنّهم موجوعين ،ساندوني أما ما تنساوش قضيّة الشهداء و الجرحى ،فيقويا صحابي يحبّو يلهيوكم بيّا ،يحبّوكم تحكيو عليّا و ما تحكيوش على سفير أمريكا يتل باش يربّح شركة أمريكية صفقة البروموسبور يحبّوكم تتضاهرو على خاطري و تنساو إلّي اليوم المحكمة العسكريّة حكمت على المتّهم في قضيّة الشهيد احمد الورغي ب4 أشهر سرسي ،تفكروني يا صحابي نصف ساعة في النهار و بقيّة النهار تفكّرو إلّي غدوة مهدي جمعة باش يقوللكم البلاد فالسة و يلزم الشعب يضحّي و ينقّص من الإحتجاجات و يزيد يلزمو يسكّر فمّو، نحبكم تتضامنو معايا أما شويّة و البقّية تضامنو فيها مع الزّوالي والبطّال والجريح و مع عايلة الشهيد والمحتاج و الّي مازال يحلم بأهداف الثورة ؛أنا ما تخافوش عليّا باش نخرجلكم برشة ثوّار مالحبس أمّا أنا خايف عليكم لا تغلطو و تتلهاو بيّا و تنساو كلّ إلّي أنا نحبّو و ناضلت من أجلو ، يا هيثم المكّي غدوة أحكي عليّا شويّة أما أحكي على إّلي كنت توّة نحكي عليه ، يا لينا ما تنساش قضيّة الحرّيات راني أنا جزء صغير منها ،يا ليلى طوبال غدوة نحبّ نلقى الباج متاعك فيها تصويرتي و البقيّة حديث على المعركة المتواصلة لعائلات شهداء الثورة ،أيّا نطفيكم فمّا شاب يحبني نحكيلو على الأيّآمات الأولى لإندلاع الثورة إي نعم ثورة و إلّي موش عاجبو يشرب من ماء وزارة الطرطور.حبيبكم السجين الحرّ عزيز عمامي

 

 

Laisser un commentaire

Your email address will not be published.