رسالة مؤثرة لمجادولين الشارني اثر استشهاد الرائد فوزي الهويملي

in A La Une/Tunisie by

في تدوينة مؤثرة قالت ماجدولين الشارني شقيقة الشهيد سقراط الشارني والوزيرة السابقة ان إستشهاد الرائد فوزي الهويملي رئيس مركز محكمة الإستئناف ببنزرت منذ قليل بعد طعنه من قبل ارهابي… أي نعم إرهابي: لن أنتظر إصدار حكم بذلك والإقرار بأنه إرهابي.. أو القول بأنه يعاني اضطرابات نفسية أو هناك خلافات شخصية: اللي يقتل أمني وهو بصدد التكبير ماينجّم يكون كان إرهابي…
فقط سأقول انعموا بديمقراطيتكم المشبوهة، وحريتكم الملعونة… فأنتم غير معنيين بدماء الشهداء: شهداء الوطن… نحكي على شهدائنا أحنا: مانيش نحكي عللي تضرب في قعدة خمرية وعاللي يسرق وقالوا عليه شهيد، مانيش نحكي على جماعة الماء فرق والتفجيرات: على خاطر نسيت ماحكيتلكمش: هيئة الحقيقة والكرامة عطاتهم صفة شهيد !!!!!!! وعملت حصص استماع علنية لجماعتهم…
قلنا حاربوا التطرّف… قالولنا حقوق الانسان…
قلنا طبقوا القانون… قالولنا المناخ الاجتماعي مايسمحش
قلنا اضمنوا حقوق القوات الحاملة للسلاح… قالولنا هاذيكا خدمتهم: فيها الخطر والموت…
قلنا قانون مكافحة الارهاب يحمي عايلة الارهابي ومايضمنش حقوق عايلات الشهداء… قالولنا اتلهاوا بأموركم وابعدوا على الملف هذا…
قلّقناهم بالوقت كي شدينا صحيح وخدمنا وحاربنا… ياخي جماعة الفيتو قالولنا احنا نحكموا وعسّوا على ارواحكم، آش مازال ليكم…
وفعلا لقيت روحي مبعد شاكي بيّ ارهابي، على خاطرني مسيت من احساسه: هو في الأصل ممنوع من دخول تونس وتوقّف في قضايا ارهابية سابقة…
هذه موش حكاية من وحي الخيال… هذه البعض من الوقائع… ومن سخرية القدر…
وموش جديد:على إثر التدوينة هذه تتعملي بطاقة جلب ونسمع بروحي نبحث في قضية ثلب وقذف…على خاطرني لقبت المجرم بالارهابي …